Арассыыйаҕа норуоттар сомоҕолоһууларын сылыгар, Саха сиригэр култуура уонна Сунтаар улууһа сурукка-бичиккэ киирбитэ 225 сылынан Г. Н. Саввинов — Уус Киргиэлэй аатынан култуура уонна сынньалаҥ пааркатыгар Сунтаардааҕы оҕо бибилэтиэкэтин үлэһиттэрэ «Ааҕыы — оонньуу түһүлгэтин» тэрийдилэр.
Оҕолорго аналлаах «Тапталлаах дойдум, киэн туттар Сунтаарым», «Илгэлээх ийэ тылым, киэн туттар барҕа баайым» кинигэ быыстапкалара турдулар. Сунтаар улууһа төрүттэммитэ 225 сылынан, Сайдыы уонна номох сылыгар аналлаах «Төрөөбүт Сунтааргын төһө билэҕин» тургутукка оҕолор уонна төрөппүттэр көхтөөхтүк кытыннылар. «Дорҕоонноохтук ааҕыы» оҕолор сахалыы остуоруйалартан, кэпсээннэртэн уонна олоҥхоттон быһа тардыылары ааҕан иһитиннэрдилэр. Сахалыы остуол оонньууларыгар бэйэлэрин сатабылларын көрдөрдүлэр. Хас биирдии кыттааччы минньигэс бириис тутан, онтон кыайыылаахтар Элгээйи “Астык” бэкээринэ бичиэнньэтин тутан үөрдүлэр.
Тэрээһиҥҥэ оҕолор эрэ буолбакка, төрөппүттэр эмиэ элбэҕи биллилэр — көрдүлэр.
