1994 сыллаахха бэрэсидьиэн уурааҕынан бэс ыйын 12 күнүн РСФСР судаарыстыбаннай суверенитетын туһунан Декларацияны ылынар күнүнэн уонна судаарыстыбаннай быһаарынньыгынан биллэриллибитэ. Бүгүн, бэс ыйын 11 күнүгэр Арассыыйа күнүн көрсө, Сунтаардааҕы оҕо бибилэтиэкэтигэр ”Улуу модун Арассыыйа” диэн бибилэтиэчинэй уруок ыытылынна. Бу тэрээһиҥҥэ Сунтаар В. Г. Павлов аатынан алын сүһүөх оскуолатын “Содружество орлят России” сайыҥҥы лааҕырын оҕолоро уонна Н.Родионова аатынан Оҕо дьоҕурун сайыннарар киин “Дебют” лааҕыр оҕолоро көхтөөх кыттыыны ыллылар. Бибилэтиэкэр М.Спирова оҕолорго Арассыыйа дойдутун төрүттэммит устуоруйатын, судаарыстыбаннаһын, норуоттарын олохторун кэпсээтэ. Салгыы судаарыстыбаннай бэлиэлэри – Арассыыйа былааҕын, дьаралыгын уонна гимни билиһиннэрдэ, хас биирдии өҥнөрө уонна ойуулара туох суолталаахтарын кэпсээтэ. Уруок түмүгэр билиини тургутар биктэриинэҕэ оҕолор көхтөөхтүк кытыннылар. Бу күн оҕолор Арассыыйа туһунан элбэҕи биллилэр.
