Сунтаардааҕы оҕо бибилэтиэкэтигэр, ахсынньы 11 күнүгэр “Ньургуһун” литературнай түмсүү чилиэнэ, олохтоох ааптар Данилова Мария Матвеевна – Күн Мичээрэ оҕолорго аналлаах “Сылгы кистээбит” остуоруйа – олоҥхо кинигэтэ сүрэхтэннэ.
Кинигэ 100 экз. Дьокуускай куоракка Ю. А. Гагарин аатынан өрөспүүбүлүкэтээҕи типографияҕа бэчээттэнэн тахсыбыт. Кинигэ олус сиэдэрэй уруһуйдарынан киэргэтиллибит. Уруһуй автордара Вера уонна Александра Петровна Ушницкаялар. Ааптар “Сылгы кистээбит”, “Субуйа Боотур уонна Килиэдимэ Хотун” диэн остуоруйа-олоҥхолоругар кырачаан ааҕааччыларын олох ыарахаттарын хорсуннук туоруурга, мындырдаан толкуйдуурга, дьоҥҥо үтүөнү оҥорорго үөрэтэр.
Мария Данилова – Күн Мичээрэ бэйэтин олоҕун, айымньылаах үлэтин туһунан көрсүһүүгэ мустубут оҕолор болҕомтолорун тардан туран сиһилии сэһэргээтэ. Сунтаар 1 №-дээх оскуолатын 7 “г” кылааһын үөрэнээччилэрэ олус сэргээн иһиттилэр.
Ааптар “Сылгы кистээбит” олоҥхо – остуоруйатын кинигэттэн быһа тардан оҕолорго ааҕан иһитиннэрдэ.
Кинигэ сүрэхтэниитин түмүгэр Мария Данилова – Күн Мичээрэ Сунтаардааҕы оҕо бибилэтиэкэтигэр кинигэтин бэлэх уунна. Аҕалбыт кинигэлэригэр, баҕа санаатын суруйан илии баттаан бигэргэттэ. Оҕолор бу көрсүһүүнү өр кэмнэргэ өйдүү-саныы сылдьыахтара диэн эрэнэбит.
